اسرار الكسكس 😍
نزولا عند رغبة المتتبعات هادي طريقتي في تحضير الكسكس كيجي لذيذ بزاف و معلك 😋
اول حاجه نبداو بها هيا التقدية هاد المرحلة مهمة بزاف .. علاش ؟ حيت الخضرة اللاوية او القديمة كتمرر الكسكسو لذلك ضروري تختاري خضرة جديدة
ندوزو دبا المكونات :
كيلو لحم بݣري، غنمي، دجاج .. او لي حبيتو غير هو الغنمي كيجي احسن في الكسكسو خصوص الديالة ديالو .
بالنسبة للخضر كنحتاجو :
- البصلة ما تكتريش منها غير وحدة متوسطه نقيها و حيدي حتى ديك القشرة التانية حيت ما كدوبش فطياب كتبقى تغزز فالماكلة.
- ماطيشة تكون حمراء و طايبة ديري تقريبا 3 الحبات متوسطين حكيهم فالحكاكة و زولي منهم الزريعة
- خيزو حلو داك لي لونو برتقالي مشعشع و زوين ماشي الباهت هداك كيكون باسل و فيه المرورة وخا يكون جديد، نقيه و قسميه على زوج
-اللفت خودي البيض لي مذاقو معتادل شوية احسن لأن الانواع الاخرى مجهدة شوية.. حتى هو قطعيه على زوج ولكن متكتريش الكمية حيت حتى هو كيمرر ديري غير 2 حبات كبار و لا 3 متوسطين و قسميهم
- الݣرعة الخضراء تكون جديدة غسليها مزيان و بلا متقشريها وقسميها على زوج كيجي المنظر ديالها زوين .
- الݣرعة الحمرة ديري زوج انواع او ثلاثه كتجي رائعة خصوص هاديك للي العرض ديالها رقيق مشات ليا سميتها هاديك لي فيها بوقالات 🤭 😅 كتغسليها و تخليها بالقشور ديالها باش تحافظ على الشكل ديالها و مادوبش لك فالبرمة .. ما تنسايش تحكي منها واحد طرف كبير باش ضيفيه من بعد في البلول
- ليشو او الملفوف حتى هو غسليه مزيان و ديري منو غير شوية فقط ربع ديال كرة متوسطة لانه الى كثرتي منو حتى هو كيبسل .. قطعيه على شكل طولي باش ميتفرتتش لك فالطياب
- واحد الفلفلة حارة
- الحمص تقريبا زلافة يكون مرقد ليلة قبل
- كاس كبير مابين زيت الزيتون و زيت الطياب
_ السمن الحايل تقريبا معلقه كبيرة
- العطرية : معلقة كبيرة ديال سكنجبير ، معلقة كبيرة خرقوم بلدي ، معلقة صغيرة بزار ، الملح حسب الذوق
طريقة تحضير :
في برمة غادي تشحري اللحم و الزيت والبصلة، غادي تبقاي تقلي فيهم حتى يبان لك البصلة دابت و اللحم تحمر، من بعد غادي ضيفي مطيشة محكوكة و السر هنا فين كاين، خصك تبقاي تشحري فديك مطيشة حتى تنشف من الماء و تعلك مع اللحم و البصلة و تبان لك تعزلات بحال شكل ديال دغميرة الدجاج عاد كضيفي الماء سخون القدر للي غادي طيب فيه الخضرة ثم بعد ذالككتزيدي العطرية .. علاش ما درناش العطرية مع تشحار حيت كتحرق لذلك فهاد المرحلة فاش كنزيديها هي و الحمص و كنسدو عليهم يطيبو نص طياب .. من بعد ما طاب اللحم و الحمص شوية كنضيفوا عليهم الݣرعة الحمراء المحكوكة باش تزيد دوب في البلول و تختروا لينا و نزيدوا خيزو و اللفت بحدهم حيت كيشدو الطياب من بعد مانحسوا انهم طابو شوية كنزيدو في المرحلة الاخيرة قطع الكرعة الحمراء و الخضراء و ليشو و السمن و الفلفلة الحارة و قبطة ديال القزبر و المعدنوس .
اهم مرحلة فهادشي كامل هيا ديك التشحيرة ديال اللحم مع البصلة و مطيشة، الى عطيتيها الخاطر صدقوني غادي تحصلوا على كسكسو معلك و لذيذ و اكيد الاضافه ديال الݣرعة حمراء محكوكة كتزيد تعلكو
نصيحة اخيرة فاش تكوني كتفوري الكسكسو زيد واحد الفلفلة حارة وسطو فالكسكاس باش تطلق الريحة ديالها فيه و يتنسم بها، ما تخافوش ما كتحررش كسكسو حيت كتبقى صاينة ما كتحلش
بالنسبة لتفاية كاين اللي كيعجبوا يزيدها كاين اللي لا .. المهم الى بغيتو نوريكم طريقتي قولها ليا فالتعليقات.
و بالصحه والعافيه 😍
ليست هناك تعليقات:
إرسال تعليق