🤎✨: هذي وصفة ديليس النوقة
🟤 نبداو بالعجينة :
500 غ زبدة + زوج مغارف كبار عسل + زوج مغارف كبار سكر ارطب + 4 مغارف كبار زيت خلطو كلش بالباتار حتى تولي الزبدة كريمية
زيدي 4 حبات بيض كاملين + مغرف لافاني+ 3 مغارف كاكاو بني مر + لاغوم تع القهوة + رشة ملح
خلطيهم مع بعض حتى يتجانسو
زيدي 4 مغارف كبار نشاء خلطي بالباتار وحبسي
هنا لمي بالفرينة مع مغرف صغيرة خميرة الحلوى حتى ترجع العجينة طرية
واذا تحبو ديرو كاس كوكاو محمص في العجينة تقدرو
🟤 الحشو تع النوڤة :
500 غ طوفيا كاراميل مع 400غ شوكولا بالحليب ( تقدرو تستعملو اي نوع انا نخدم نص بالوجدان ونص بلأومباسادور بالحليب )
ذوبي الشوكولا عادي كي تذوب زيدي طوفيا خلطي راح تتجانس مليح زيدي لاغوم تع القهوة + قرصة ملح
وزيدي طيبي براس قهوة تكون ثقيلة كي طيب زيدي نص كاس وهي سخوووونة باش النوڤة متفسدش وخلطي + كاس كوكاو محمص ملييييح ومرحي مدشش خلطي كلش من بعضاه راح تجي وحد النوڤة بنينة تهبل الطعم تاعها قريب للكابريس مي فيها طعم القهوة تهبل وفي نفس الوقت راح تكسر الحلاوة + 3 مغارف كبار كاكاو بني مر
🟤 الحشو الثاني:
250 غ زبدة اوبلين + 250 غ طوفيا كاراميل+ 150 غ حلوة ترك + قرصة ملح
خلطوهم كامل مليح مع بعض حتى تولي الكريمة خفيفة وبنينة تهبل
🟤 الطريقة باينة جهة ديرو فيها النوڨة وجهة فيها كريمة الزبدة اغلقو مع بعض وڨلاصيو بشوكولا تحبو تخلو شوكولا سامبل ولا تزيدولها الكوكاو ولا تحبو تدهنو الحبة من فوق بالكونفيتير وتغمسوها في الكوكاو المحمص
🤎✨: لي تقلي تجي حلوة بزاف ماهيش حلوة لي ذاقوه يعطوكم الخبر لانو الصابلي مش حلو والنوڤة تتكسر حلاوتها بالقهوة والكاكاو
ليست هناك تعليقات:
إرسال تعليق